Bunga

Noon Ako'y isang bunga

ubod ng tamis

ubod ng ganda

dumaan ang mga dekada

dumaan ang bagyo

nalaglag ako sa lupa

walang lakas na bumalik

wlang lakas na tumakbo

nakita ko ang mundo sa ibaba

madumi, malungkot, malayo

malayo sa aking hangin

malayo sa aking araw

malayo sa mata ng karamihan

inapakan ako at nadurog

gumulong pa layo

malayo sa lupang aking nililingon mula sa itaas

Ngayon ako'y nabubulok

Ngayon ako'y basura

nilalangaw sa umaga

dinadaga sa gabi

walang araw na di ko ninais na maging bunga ulit

ako'y nakalimutan na

ako'y wala na

sa aking huling oras ako'y sumasamo

sa may kapal na may gawa ng lahat

nais kong mabuhay sa isang mundong

magkakabit ang lupa at langit

nais kong mabuhay sa mundong

walang mataas at walang mababa

nais ko sanang maibsan

ang sakit ng aking pagbagsak

Tinabunan siya ng lupa

Naglaho sa mundong ibabaw

Ngunit isang araw

Ang halaman ay tumubo

Lumago at Yumabong

Naabot nya ang langit

Habang nakatapak sa lupa

Tumanda siya at nagkabunga

ilan sa mga bunga ang babagsak?

ilan sa mga bunga ang kakanin?

ilan sa mga bunga ang magiging puno?

ilan sa mga bunga ang hindi na muling tutubo?